O Pazo de Goiáns (Boiro) vai acoller este venres 11 de abril os detalles do proxecto O que nos conta o mar de Arousa, a partir das 20.00 horas. Trátase dunha iniciativa do GALP Ría de Arousa e o Concello de Boiro que involucra catro sectores relevantes como son o mar, a cultura, a educación e a investigación. A primeira do proxecto consistiu na elaboración e impresión de obras literarias infantís e na creación de materiais didácticos de apoio. A segunda é a difusión mediante a intervención lectora en escolas de primaria a cargo de persoas do sector do mar e profesionais da divulgación.
O obxectivo do proxecto é a “transmisión do coñecemento xerado en universidades e centros de investigación ás xeracións novas a través de obras literarias infantís e de materiais didácticos asociados ás mesmas, así como a transmisión do patrimonio inmaterial vinculado á pesca e o marisqueo da ría de Arousa”. Preténdese dar respostas a cuestións centrais do cambio climático, pesca e sostibilidade do medio mariño baseadas no rigor científico. Ao mesmo tempo preténdese promover a carreira investigadora e as profesións asociadas ao marisqueo e a pesca espertando o interese nas novas xeracións. As obras literarias incidirán no rol da muller na ciencia e no mar e empregarán historias mariñeiras tradicionais, coñecementos e saberes populares característicos do sector na ría de Arousa e a talasonimia asociada, para fortalecer a conservación dos mesmos nas xeracións devandeiras.
