O presidente da Xunta, Alfonso Rueda, anunciou que o Catálogo do patrimonio cultural do litoral de Galicia será aprobado no último trimestre deste ano. Este catálogo, unha das primeiras medidas postas en marcha ao abeiro da Lei de ordenación e xestión do litoral, busca inventariar e protexer elementos culturais e históricos da franxa costeira galega.
A aprobación desta iniciativa forma parte do desenvolvemento das competencias que Galicia asumirá plenamente a partir do 1 de xullo, tras o acordo histórico de traspaso de servizos e recursos por parte do Goberno central. Este proceso implica a transferencia de 36 postos de traballo, 11 vehículos e un financiamento de 1,2 millóns de euros anuais para a xestión costeira.
Entre as accións destacadas atópase o impulso dun Pacto galego polo litoral, destinado a promover un modelo de desenvolvemento sostible na zona costeira. Así mesmo, no último trimestre do ano está prevista a aprobación das Directrices de ordenación do litoral (DOL), que establecerán o marco de referencia para futuras regulacións.
Outras iniciativas inclúen a creación do Foro do Litoral de Galicia, un órgano de participación e consulta, e a Comisión interdepartamental de coordinación do litoral. Ademais, modificarase a normativa vixente para integrar e simplificar os procedementos administrativos relacionados co uso da costa.
Rueda lembrou que a comunidade galega ten a costa máis extensa de España: algo máis de 2.500 quilómetros, contando o perímetro costeiro pero tamén illas, illotes, marismas e areais. Unha realidade xeográfica que a diferencia doutras comunidades e explica por que o seu modelo produtivo e forma de vida estiveron historicamente ligados ao mar e, por tanto, requiren criterios e regulacións específicos.
A conselleira, pola súa banda, indicou tamén que esta lei permitirá levar a cabo a xestión de “1,6 millóns de hectáreas” marítimas e terrestres en “86 concellos” que concentran “ao 58% da poboación galega”, é dicir, 1,5 millóns de persoas.
