O Hotel Monumento San Francisco de Santiago de Compostela foi escenario da entrega do XIII Premio Internacional de Investigación Oncolóxica Científica e Técnica Ramiro Carregal, concedido á Dra. Manuela Gago Domínguez, natural de Palmeira e do VI Premio a Talentos Emerxentes, outorgado á Dra. Noelia Tarazona Llavero.
Ramiro Carregal inaugurou o evento felicitando as galardoadas, destacando a excepcionalidade das súas traxectorias profesionais e manifestando o orgullo de contar cunha investigadora arousá entre os premiados. O acto, presidido polo presidente da Xunta, Alfonso Rueda, puxo de relevo os avances no tratamento e prevención do cancro grazas á profesionalidade do persoal sanitario e investigador galego, así como á implicación da sociedade e recursos achegados polos impostos. Rueda agradeceu a Ramiro Carregal o seu incansable apoio á ciencia en Galicia.
Entre os momentos máis destacados, o Dr. Rafael López, presidente executivo do xurado, eloxiou a traxectoria de Ramiro Carregal como mecenas e anunciou o fallo dos premios. A Dra. Gago, líder do Grupo de Xenética e Epidemioloxía do Cancro do IDIS, explicou o seu traballo nun proxecto de medicina de precisión para o cribado personalizado do cancro de mama, financiado con 1,2 millóns de euros e que implicará a participación de 10.000 mulleres de 14 comunidades autónomas. Pola súa parte, a Dra. Tarazona subliñou o impacto da biopsia líquida na personalización dos tratamentos do cancro colorrectal.
A gala culminou cun cóctel no Patio de Cristal, que serviu como broche de ouro a un evento que celebra a dedicación, innovación e compromiso co progreso da ciencia e da saúde.
