A piscina municipal de Outes acolleu esta mañá o acto de clausura do III Seminario Intensivo de Defensa Persoal Feminina, unha iniciativa promovida pola Deputación da Coruña que pecha a súa terceira edición cun balance moi positivo. Máis de 300 mulleres, de idades comprendidas entre os 12 e os 70 anos, participaron nos diversos cursos desenvolvidos ao longo da provincia.
O deputado de Deportes, Antonio Leira, estivo presente na entrega de diplomas e salientou a relevancia deste programa, destacando que “non só contribúe á adquisición de hábitos saudables, senón que tamén proporciona ás mulleres ferramentas prácticas que reforzan a súa confianza e autonomía persoal”.
Os seminarios, de carácter gratuíto, realizáronse en colaboración con distintos concellos (Cedeira, Ordes, Valdoviño, Negreira, A Pobra do Caramiñal, Creceda, Arzúa e Outes). As participantes recibiron formación básica en técnicas de defensa persoal durante sesións de tres horas, impartidas por especialistas, e traballaron aspectos físicos e emocionais vinculados á autoprotección.
Con esta iniciativa, a Deputación da Coruña reafirma o seu compromiso cunha programación deportiva inclusiva e con perspectiva de xénero, contribuíndo á igualdade real e á loita contra as violencias machistas tamén desde o ámbito deportivo.
