O Concello de Rianxo fixo balance da participación acadada na segunda edición da Andaina Solidaria BarbanTEA, convocada os días pasados co obxectivo de colaborar coa asociación inclusiva do mesmo nome e contribuír a concienciar á poboación da necesidade de traballar pola integración das persoas con trastornos de espectro autista. Segundo confirmou o Goberno local, até 400 persoas participaron na camiñada.
O alcalde, Julián Bustelo, fíxolle entrega do diñeiro recadado na andaina á presidenta da asociación da nosa comarca, un total de 2.122,40€.
Foi unha andaina de trazado suave e accesíbel, de cinco quilómetros de percorrido, que discorreu sobre todo polo paseo marítimo rianxeiro e a senda litoral de Taragoña. Celebrouse o pasado 6 de abril, con posibilidade de realizala en clave “presencial” ou colaborar co dorsal 0. O punto de reunión foi na praza da Virxe de Guadalupe de Rianxo.
A andaina formou parte das actividades coas que o Concello celebrou o Día Mundial do Autismo, o 2 de abril. Fíxoo cunha programación especial orientada “a reivindicar a necesidade de contribuír a mellorar a calidade de vida das persoas con trastorno do espectro do autismo (TEA) e promover a súa participación en todos os ámbitos da sociedade”. Ademais da andaina do día 6 de abril, durante os días previos leváronse a cabo diferentes actividades formativas e divulgativas orientadas aos clubs deportivos do municipio, entidades asociativas e ao conxunto da veciñanza.
