A Unidade Pastoral de Ribeira, coa colaboración do Concello, achéganos novamente (este 2025) unha relevante axenda actividades de Semana Santa. A programación arrinca o Domingo de Ramos (13 de abril) coa bendición, procesión e celebración dos ramos na capela do Hospital (ás 10.00 horas) e na Igrexa de Santa Clara (ás 10.30 horas). Media hora máis tarde (ás 11.00 horas) celebrarase a bendición, procesión e misa de ramos en Oleiros, Aguiño e Corrubedo. Ás 12.00 será a quenda de Santa Uxía (Ribeira) e ás 12.30 de Artes e de Olveira.
A axenda de actividades foi compartida este martes 8 de abril por Alfonso Mera, Sidonio José Alves de Sousa e Sylvestre Marcel, sacerdotes da UPA de Ribeira, e, polo concelleiro Francisco Suárez-Puerta.
O párroco de Ribeira, Alfonso Mera introduciu o acto presentando o cartel, “que este ano fala un pouco do día de hoxe” e engadiu, “a Semana Santa non é algo para recordar senón que facemos memoria e vivimos en primeira persoa”. O cartel mostra unha foto cun cravo mergullándose nos pés de Xesús, e por outra banda vense imaxes de conflitos bélicos actuais, e rematou: “Descubrimos a Cristo crucificado, ao Cristo sufrinte nos rostros de hoxe”.
O Luns, Martes e Mércores Santo realizaranse visitas a persoas maiores e doentes, coa colaboración das familias. A celebración penitencial celebrarase coa seguinte axenda: o luns ás 18.00 horas en Corrubedo e ás 19.00 en Olveira; o martes ás 18.00 en Oleiros e ás 19.00 en Artes; e o mércores ás 18.00 horas en Aguiño e ás 19.00 en Ribeira.
O Xoves Santo (17 de abril) inclúe importantes actividades en Santa Uxía e noutras parroquias. Así, a Celebración da Santa Cea celebrarase ás 17.00 horas en Corrubedo, Oleiros e Aguiño; ás 18.30 horas en Olveira e Artes; e ás 19.30 horas está previsto que se celebre a Celebración da Santa Cea en Santa Uxía de Ribeira para dar paso á procesión do Paso ás 21.00 horas. Ás 22.30 horas será a quenda da Hora Santa.
O Venres Santo organizarase ás 10.00 horas un Vía Crucis dende Sobrido (Oleiros) até o miradoiro da Curota (7 quilómetros). A Celebración da Paixón do Señor terá lugar ás 17.00 horas en Corrubedo, Oleiros e Aguiño, e ás 18.30 horas en Olveira e Artes. Polo que respecta a Ribeira, a celebración do Venres Santo comezará ás 11.30 horas co Sermón do Encontro en Santa Uxía. Ás 19.00 horas será a Celebración da Paixón en Ribeira, acto que precederá o Sermón das Sete Palabras e o Desencravo (ás 20.00 horas) e á Procesión do Santo Enterro (ás 21.00 horas).
O Sábado Santo (19 de abril) celebrarase ás 22.00 horas a Vixilia Pascual conxunta da Unidade Pastoral de Ribeira, no templo parroquial de Santa Uxía.
O Domingo de Resurrección (20 de abril) haberá Misas de Pascua no Hospital do Barbanza (ás 10.00 horas), en Santa Clara, Oleiros, Corrubedo e Aguiño (ás 11.00 horas), e en Artes, Olveira e Ribeira (ás 12.00 horas).
A maiores, a Unidade Pastoral de Ribeira pon o foco na mocidade a través da Semana Santa Xuvenil, unha “celebración que nos prepara para vivir con alegría a Pascua do Señor”. onde as mozas e mozos participantes terán a oportunidade de “descubrir o rostro de Deus nos crucificados actuais”. O programa inclúe charlas, peregrinacións, saídas e outras actividades. As inscricións poden formalizarse a través do 981 87 11 88 e da conta de correo upariveira@gmail.com. Esta actividade laica, consensuada coa UPA, foi dada a coñecer polo concelleiro Francisco Suárez-Puerta, que sinalou que coa intención de dinamizar as rúas de Ribeira durante o sábado 19 de abril “celebrarase por primeira vez en Ribeira a actuación de 10 grupos musicais no mesmo día co nome de Rúas Musicais”. Esta iniciativa conxunta entre a Concellería de Turismo máis a participación de 16 locais de hostalería “encherá Ribeira da mellor música en directo con grupos como The Lacazáns, Human Band, Riverside Dukes, entre outros”.
