A Deputación da Coruña financiou a compra de dez vehículos a entidades sen ánimo de lucro da provincia para a mellora da prestación de servizos sociais. O Boletín Oficial da Provincia publicou este xoves 10 de abril a concesión definitiva deste programa de subvencións ao que a institución provincial destina un total de 373.168,07 euros.
A finalidade deste programa é “o apoio a agrupacións privadas sen ánimo de lucro e con sede na provincia da Coruña que presten servizos a persoas con algún tipo de diversidade funcional, con trastornos aditivos, maiores ou persoas en risco de exclusión social”.
Deste xeito, a Deputación concedeu importes que van desde os 18.842,45 euros ata os 50.000 en función do coeficiente obtido, baseado nun réxime de concorrencia competitiva e a través dos criterios obxectivos, ata un máximo do 80% do orzamento.
A entidade provincial facilita a adquisición de furgóns de carga, furgonetas de transporte ou furgonetas de transporte adaptadas a cadeiras de rodas. Así, o obxectivo é facilitar tanto o transporte de persoas a través de vehículos adaptados ou non adaptados como o de mercancías para o reparto de alimentos, roupa ou outros elementos de primeira necesidade.
Entre as entidades que obtiveron estas achegas atópanse dúas do Barbanza e a súa contorna: a Asociación de Discapacitados da Bisbarra de Muros (ADISBISMUR) ou a Asociación Saúde Mental A Creba.
O presidente da Deputación da Coruña, Valentín González Formoso, apuntou que este programa é “unha axuda moi demandada polas propias entidades sociais, que apoia o labor diario das mesmas” e incidiu en que estes vehículos “axudarán a mellorar a vida de centos de persoas, a maior parte delas con discapacidade, que acoden a diario a centros de día, de tratamento e rehabilitación ou ocupacionais”.
