O Concello de Lousame celebrou unha sesión plenaria ordinaria marcada pola unanimidade, na que se aprobaron todos os puntos da orde do día cos votos favorables dos tres grupos municipais (PP, PSOE e BNG). A única excepción foi a adhesión á Central de Contratación da FEMP, na que o BNG optou por absterse.
Entre os acordos máis destacados figura a decisión de solicitar unha subvención nominativa á Deputación Provincial da Coruña para financiar a renovación do céspede artificial do campo de fútbol municipal de Cabanetán. Inicialmente, o PSOE propuxera incluír esta actuación no Plan Adicional 2025, pero, tras un intenso debate, todos os grupos municipais acordaron modificar a moción e optar pola subvención nominativa. O acordo final foi tomado ante a presenza da directiva e simpatizantes do Lesende CF.
Ademais, aprobouse unha moción conxunta para organizar en maio actividades de recoñecemento e homenaxe ao prestixioso musicólogo Xosé López Calo, coñecido como “Pepito do maestro”, con motivo do quinto aniversario do seu pasamento. López Calo, natural de Nebra (Porto do Son) e residente en Vilacoba (Lousame), foi unha figura destacada na historia da música galega e internacional. A alcaldesa Teresa Villaverde destacou o seu legado excepcional e anunciou unha serie de accións para manter viva a súa memoria para futuras xeracións.
