Unión de Cidadáns Independentes (UCIN Galicia), a través do seu responsábel José Luis Calo, compartiu un comunicado crítico co estado no que se atopan algunhas praias da comarca do Barbanza, concretamente poñen o foco no areal de Barraña, en Boiro, que, segundo denuncia, “atópase nun estado lamentábel”, e engaden que !as adversidades meteorolóxicas que se deron hai días esnaquizaron gran parte do areal e deixado moreas de lixo enriba da area, sen que até o de agora actuara para retiralo o Goberno local”.
Desde UCIN consideran “que non se pode admitir” que o Executivo local “aínda non liquidase a situación, a través das brigadas de limpeza, condenando a un continuo malestar aos cidadáns que fan uso das praias durante todo o ano, ben para fins de lecer ou deportivos”. Engaden que “vemos a necesidade dunha unidade exclusiva destinada á conservación permanente do estado das praias e vaia máis aló na súa política de prevención, conservación e xestión das mesmas”. José Luis Calo apunta tamén que “non podemos vender Boiro como pobo turístico cando un dos nosos maiores atractivos, como son as praias, atópanse nun penoso estado”.
