O pasado venres 21 de marzo celebrouse no Liceo de Noia o XIX Torneo de Tenis de Mesa, organizado por Saúde Mental FEAFES Galicia e a Asociación Saúde Mental A Creba, contando coa colaboración do propio Liceo de Noia.
No torneo competiron diversas asociacións do ámbito da saúde mental: A Creba, Alume, Adaina, APEM, Avelaíña, DOA, Saúde Mental Ferrol, Saúde Mental FEAFES Santiago e Saúde Mental FEAFES Vigo, cun total de 52 persoas participantes que compartiron despois un xantar de convivencia.
O primeiro posto levouno Marcos Traba da asociación APEM, que recibiu o trofeo por parte de Xosé Ramón Girón, presidente de Saúde Mental FEAFES Galicia. No segundo lugar quedou Salustiano Ribera da asociación Doa, entregándolle o trofeo Nacho Carnota, membro da xunta directa do Liceo de Noia. E por último, os dous terceiros postos foron para Francisco Brandán e Diego Agís, de Saúde Mental FEAFES Vigo, os cales recibiron os trofeos da man de Laura Salgado, concelleira de Xuventude de Noia; e Santiago Rodríguez, concelleiro de Deportes de Noia.
Este tipo de actividades buscan “fomentar o exercicio físico entre as persoas con problemas de saúde mental, xa que, ademais de participar no torneo, adestran durante o ano para competir en representación da asociación á que pertencen”, informaron dende a organización.
Con isto, engadiron dende A Creba, búscase tamén desmontar o estigma negativo relacionado coas persoas que teñen problemas de saúde mental, “mostrando unha competición aberta ao público na que compartir un interese común e socializar, á par que se normaliza unha realidade cada vez máis habitual na sociedade”.
—
