No marco da conmemoración do Día Internacional do Teatro Infantil e Xuvenil, a concelleira de Cultura, Antía Alberte Maneiro, visitará esta tarde a Escola Municipal Infantil de Teatro de Ribeira, acompañada polo xestor cultural do concello, Unai González. O encontro terá lugar no auditorio municipal e permitirá coñecer de preto o traballo desenvolvido polo alumnado.
As nenas e nenos participantes, baixo a dirección de Óscar Romero, director do Grupo Municipal de Teatro (GMT), e a axudante de dirección, Carmen Peña, están a preparar unha nova montaxe teatral que será estreada no mes de maio. A representación enmarcarase na Mostra de Teatro Infantil “Daniel Gómez Ramil”, un evento que celebra xa 25 anos de existencia e que constitúe un referente no ámbito teatral infantil en Galicia.
O teatro en Ribeira goza dunha excelente saúde, grazas a iniciativas como a Mostra Infantil, que este ano celebra as súas vodas de prata, a Escola Municipal de Teatro para cativada de 7 a 13 anos ou o propio grupo municipal de teatro afeccionado, que leva as súas funcións por vilas e cidades de todo o país. Ademais, Ribeira é berce de recoñecidos dramaturgos e artistas como Quico Cadaval e Susana Sampedro.
Desde o concello, reivindícase o papel fundamental do teatro como ferramenta educativa e cultural para a infancia e a mocidade.
Longa vida ao teatro e feliz Día Internacional do Teatro Infantil e Xuvenil!
