O Concello de Ribeira puxo en funcionamento este luns 17 de marzo dous aseos públicos autolimpiábeis, unha medida coa que o Goberno local quixo atender a unha “demanda histórica” da veciñanza. O investimento para a instalación destes aseos ascendeu a 100.000 euros, financiados dos fondos Next-Generation, permitindo dotar ao municipio de infraestruturas modernas e accesíbeis.
O alcalde Luís Pérez Barral e o concelleiro Francisco Suárez-Puerta explicaron que os novos servizos situáronse en puntos estratéxicos da localidade para garantir un mellor servizo: un no parque das Avesadas e outro na zona do paseo marítimo de Banda ao Río – O Touro. Estas localizacións foron elixidas pola alta afluencia de persoas que reciben diariamente, especialmente en tempadas de maior actividade, como os meses de verán e os eventos festivos.
Engadiron que os devanditos módulos posicionan a Ribeira na vangarda do deseño e tecnoloxía aplicada aos aseos públicos. Os materiais empregados son de primeira calidade, impermeábeis, non absorbentes, antivandálicos, resistentes ao desgaste, sólidos e inalterábeis por axentes externos e atmosféricos e totalmente homologados, cumprindo as normas específicas”, sinalaron, engadindo que “a estrutura principal de perfís tubulares en aceiro galvanizado e con pintura polimerizada” e que “os aseos son aptos para a utilización mixta e para persoas con diversidade funcional xa que o acceso e a maniobralidade no interior da cabina cumpre a normativa vixente en materia de accesibilidade”.
Ademais, sinalaron que a cabina conta cun sistema de funcionamento automático que permite a limpeza do asento e do inodoro despois de cada uso e do chan de cabina.
A maiores, a porta de acceso é de seguridade e antivandálica en aceiro inoxidábel, con illamento térmico e acústico e fechadura con electroimán. A apertura poderá realizarse con premedor e desde o exterior onde haberá un indicador de exterior de libre, ocupado (ou autolimpieza) e fóra de servizo con simboloxía retroiluminada en LED, luces que variarán as cores segundo o estado de dispoñibilidade. A cabina conta con iluminación natural e iluminación LED.
O alcalde de Ribeira, Luís Pérez Barral, destacou a importancia desta iniciativa para a mellora da calidade de vida no municipio: “Estes novos aseos públicos autolimpiábeis respondemos a unha necesidade histórica do municipio e contribúen a que Ribeira teña mellores infraestruturas para a veciñanza e para todas as persoas que nos visitan”.
Coa posta en marcha destes aseos, dende o Concello informan que xa habería en funcionamento tres na zona da praia de Coroso, o das Avesadas, o do paseo do Touro, e tamén os do apeadoiro de autobuses. “Imos seguir despregando paseniñamenbte estes equipamentos accesíbeis e funcionais para mellorar os espazos públicos dos que desfruta a veciñanza”.
