O Concello de Boiro recibiu este martes 25 de marzo a visita de José dos Reis, alcalde, e Osvaldo Chantre, concelleiro do municipio caboverdiano de Tarrafal no marco do proxecto Apoio ao Desenvolvemento Económico Local do Municipio do Tarrafal do Fondo Galego de Cooperación e Solidariedade. Na visita estiveron acompañados polo alcalde, José Ramón Romero, o concelleiro de Política Social, Raúl Treus, e a concelleira de Medio Ambiente, Olga González.
O proxecto comezou no ano 2024 detectando as necesidades e potencialidades da zona como punto de partida para unha colaboración de catro anos. Nesta semana percorrerán unha decena de concellos socios do Fondo Galego para coñecer boas prácticas no ámbito da agricultura, a gandería e a pesca.
A visita en Boiro consistiu, ademais dunha recepción institucional no Concello, tiveron oportunidade de coñecer a cetárea Ángel Mar en Abanqueiro para coñecer o proceso de depuración do marisco.
Máis tarde desprazáronse ás instalacións de JJ Chicolino para coñecer as distintas liñas de traballo que desenvolve a empresa nas súas factorías para a produción de solucións para acuicultura e pesca.
