Texto e fotos: Juan Caballero. A localidade de Portosín acolle este sábado o inicio do Campionato Galego e Campionato de España Inclusivo de Motonáutica Grupo Davila, unha primeira toma de contacto coa competición oficial e que forma parte de ambos os calendarios grazas ao labor desenvolvido desde a Real Federación Galega de Motonáutica.
Con arranque ás 10 da mañá, os pilotos poñerán a proba a súa pericia, para a que estiveron adestrando neste primeiro trimestre de 2025, coas súas expectativas postas en ambas as clasificacións, tanto na galega como na española. Non en balde, a Real Federación Galega de Motonáutica foi pioneira e emprendedora desta categoría, especialidade que leva promovendo desde hai algúns anos e que viu apoiada coa sinatura do recente convenio co Liceo Marítimo de Bouzas, entidade que cede unha praza de amarre para este tipo de embarcacións, facilitando a súa práctica na sempre tranquila dársena boucense, e o apoio unánime do Grupo Davila.
O Campionato Inclusivo de Motonáutica Grupo Davila conta cun circuíto composto de 6 probas, das que a súa totalidade conforman o campionato galego e só tres o nacional, sendo estas últimas as de Portosín, Outes e Vigo, contando con sedes como Tomiño, Agolada ou Castrelo de Miño.
Tras a conclusión desta primeira proba, entregaranse nas instalacións do Real Club Náutico Portosín, os premios correspondentes á tempada de 2024. As probas consisten nun percorrido con boias fondeadas para trazar un slalom e as sempre complicadas probas de habilidade como o fondeo, rescate, pelota-cesta e amarre. Portosín será sede do inicio de ambos os campionatos o vindeiro sábado 29 de marzo, sendo a de Outes a segunda proba o 5 de abril, para finalizar o nacional en Vigo, no Liceo Marítimo de Bouzas, o 20 de setembro deste ano 2025. Colaboran o Consello Superior de Deportes, a Xunta de Galicia, os Concellos de Porto do Son e Outes, a Deputación da Coruña, o Real Club Náutico Portosín, ADECO-DEA e o Club Minauta.
