Este ano entrou en vigor a modificación da Lei de Portos impulsada pola Xunta para permitir a ampliación dos prazos de vixencia das concesións en terreos portuarios de titularidade autonómica, chegando ata os 75 anos para empresas e entidades con actividade estratéxica para os portos. O presidente de Portos de Galicia, José Antonio Álvarez, reuniuse con representantes de Marinas de Galicia, entidade que agrupa a concesionarios de portos deportivos de titularidade autonómica, para abordar a aplicación deste cambio normativo e fomentar o investimento nos portos náuticos, co consecuente aumento de actividade económica, xeración de riqueza e emprego neste sector crave dos portos galegos.
Nesta liña, o presidente da entidade pública compartiu expectativas para este ano, despois de que o ano pasado rexistrásense 5.834 tránsitos de embarcacións estranxeiras nas 73 instalacións náutico-deportivas da comunidade, sumando un total de 31.200 pernoitas. Destacou o potencial de Galicia no desenvolvemento desta modalidade de turismo, vinculada ao Camiño de Santiago por mar e á gastronomía galega, que serve como elemento dinamizador das economías das comunidades costeiras. O volume de negocio alcanzou os 6,2 millóns de euros en 2024, grazas a unha media de ocupación superior ao 80% ao longo dos 12 meses.
José Antonio Álvarez valorou a estreita colaboración de Portos con estas entidades para impulsar medidas que melloren a calidade dos servizos aos usuarios, promovendo a excelencia que permita atraer máis tránsitos e fomentando o crecemento do turismo náutico en Galicia. Ademais, búscase a obtención de certificados como a Bandeira Azul, S de Sustentabilidade, Q, EMAS ou ISO 14001. Este traballo compleméntase coa promoción diferenciada en feiras internacionais como as da Rochelle, Southampton, Düsseldorf, Ámsterdam ou París, co obxectivo de posicionar á comunidade como un destino de turismo náutico de referencia no Atlántico europeo.
