Porto do Son celebrou este domingo 16 de marzo unha nova actividade do Concello encadrada na celebración do 8M, Día Internacional da Muller: unha actividade participativa que tivo o obxectivo de visualizar dende o lecer ao aire libre a necesidade de seguir derrubando os muros que discriminan ás mulleres en múltiples ámbitos da vida diaria. A Andaina pola Igualdade, que tivo que ser aprazada dende o 9 de marzo por mol do mal tempo, contou coa presenza dun centenar de persoas, aproximadamente, entre as que se contaban membros do Concello e da Corporación, incluído o alcalde Luis Oujo, quen sinalou que foi “un día estelar para gozar dunha gran senda pola igualdade. O Concello agradeceu a implicación das persoas participantes e, tamén, a colaboración de Cruz Vermella de Noia. A andaina foi un percorrido dende o monte Enxa ata Portosín, cun itinerario de 14 quilómetros e de dificultade baixa.
Actividades durante case todo o mes
As actividades do Concello de Porto do Son para celebrar este 8M, Día Internacional da Muller, deron comezo o pasado 7 de marzo cunhas Xornadas Gratuítas de Ioga e proseguiron cos actos institucionais do sábado 8M, precisamente. Este 17 de marzo o Viveiro de Empresas acollerá, en horario de 16:00 a 20:00 h, un curso de estilos de vida saudábeis e mindfulness. Esta actividade está financiada polo SERGAS a través da Escola Galega de Saúde para Cidadáns.
O venres desta mesma semana, o 21 de marzo, o Viveiro de Empresas volverá a acoller outro curso, este destinado ao autocoidado emocional das mulleres. Esta formación realizarase en horario de 16:00 a 20:00 h e conta co financiamento do SERGAS a través da Escola Galega de Saúde para Cidadáns. As inscricións están abertas para toda a veciñanza e realizaranse enviando unha solicitude ao enderezo electrónico maria.santos.lemina@portodoson.gal.
Ademais, desde o mes de marzo e ata xuño están programados diversos obradoiros de benestar psicolóxico no viveiro de empresas. Esta actividade, financiada a través do Pacto de Estado, está aberta a toda a veciñanza e poderán inscribirse na área de Benestar Social ou a través do enderezo electrónico maria.santos.lemina@portodoson.gal.
Desde o Goberno animan a toda a veciñanza a participar neste completo programa do 8M, co obxectivo de expoñer as reivindicacións en materia de igualdade que teñen lugar polo Día Internacional da Muller.
