A axenda cultural do Barbanza para o mes de abril será unha axenda potente. Entre as citas máis destacadas salientan as do II Ciclo de Monólogos de Porto do Son. Organizado polo Concello de Porto do Son, a través da Área de Cultura, o ciclo traerá á vila algúns dos principais humoristas do panorama galego actual e actuacións todos os sábados do mes de abril, a partir das 21:00 h na Casa da Cultura de Porto do Son.
Comezará o 5 de abril con Pepo Suevos, con Á Caída 2025 (a resposta contundente de Pepo Suevos á cuestión de se a comedia está en crise, reivindicando a importancia da risa para enfrontarse á realidade adversa que nos tocou vivir) e proseguirá o día 12 de abril con Arantxa Treus e Sexo débil, o carallo (un show de comedia no que se abordan cuestións como a sexualidade feminina, as relacións de parella, ou as esixencias estéticas que sofren as mulleres).
O día 19 toma a palabra Oswaldo Digón con Outra Movida (texto no que Oswaldo fala da sensación que temos desde que pasamos a pandemia e con isto que se denomina nova normalidade) e o día 26 Evaristo Calvo porá o broche de ouro ao ciclo con A ver que pasa (espectáculo centrado nas fobias e filias do autor, membro de Mofa & Befa, e na súa descarada indiferenza polos asuntos importantes, acompañándose tanto da súa non obra poética coma pola non obra narrativa).
A programación é a seguinte:
-5 de abril | 21:00 h | Pepo Suevos con Á Caída 2025
–12 de abril | 21:00 h | Arantxa Treus con Sexo débil… o carallo
-19 de abril | 21:00 h | Oswaldo Digón con Outra Movida
-26 de abril | 21:00 h | Evaristo Calvo con A Ver Que Pasa
As entradas, que terán un custe de 6 euros, estarán á venda desde mañá, martes 18 de marzo en:
Casa do Concello de Porto do Son (alcaldía) >> L/V · 8:30h a 15:00h
Casa da Cultura de Porto do Son >> L/V · 8:00h a 15:00h
Casa da Cultura de Miñortos >> L/V · 17:30h a 20:30h
Casa da Cultura de Portosín >> L/V · 8:00h a 13:00h + 17:00h a 19:30h
Casa da Cultura de San Pedro >> L/V · 16:00h a 20:00h
Ademais, haberá un bono pola compra das catro actuacións que terá un custo de 20 euros.
