Portosín da a saída ás citas galega e nacional con Outes no horizonte máis próximo para a segunda proba
Os noieses Pepe Barrio e María Barrio Bouzas comezaron con forza a tempada, liderando o Campionato Gallego e o Campionato de España Inclusivo de Motonáutica Grupo Davila. A competición tivo lugar en augas da Ría de Muros e Noia, coa participación de 13 equipos nunha xornada emocionante que marcou o inicio deste circuíto.
Organizado polas Reais Federacións Española e Galega de Motonáutica e patrocinado polo Grupo Davila, o evento contou co apoio do Consello Superior de Deportes, a Xunta de Galicia, os Concellos de Porto do Son e Outes, a Deputación da Coruña, e diversas entidades como o Real Club Náutico Portosín, Adeco-Dea e o Club Minauta.
O trazado da primeira proba, deseñado como unha gymkana na entrada ao porto deportivo de Portosín, foi xestionado polo responsable técnico federativo, Carlos Estévez, co apoio de David Castro. A tripulación de Pepe Barrio e María Barrio Bouzas rexistrou un tempo excepcional de 2´47”, posicionándose na cima. Seguíronlles José Francisco Iglesias e María Barrio (2´48”) e Enrique Deus e María Barrio (2´39”), completando un podio moi competitivo.
Durante esta cita, tamén se celebrou a entrega de premios correspondente á tempada 2024, onde destacaron como campións José Luís Álvarez e Gonzalo Eugenio Riveira, escoltados por Joaquín Barrio Guldrís e Joaquín Barrio Bouzas no segundo posto, e Enrique Deus e Joaquín Barrio co bronce.
O Campionato Inclusivo de Motonáutica Grupo Davila, cun total de seis probas no seu circuíto galego e tres no nacional, promete momentos de máxima emoción. A próxima cita será en Outes o 5 de abril, mentres que a gran final nacional terá lugar o 20 de setembro no Liceo Marítimo de Bouzas, Vigo.
As probas combinan habilidade e precisión, con desafíos como slalom, fondeo, rescate, pelota-cesta e amarre, destacando o carácter inclusivo e deportivo deste evento único en España.
