O Pleno do Concello de Padrón debaterá na súa sesión ordinaria do 27 de marzo a proposta para a retirada das honras e distincións concedidas ao ditador Francisco Franco. Esta medida enmárcase no cumprimento da Lei 20/2022 de Memoria Democrática.
A iniciativa xorde despois da confirmación dun feito histórico: en 1945, o Concello de Padrón outorgou a Franco tres recoñecementos honoríficos con motivo da súa visita á vila para a Exposición Agrícola do Día de Galicia. O ditador foi nomeado fillo adoptivo de Padrón, Alcalde honorario e receptor da Medalla de Ouro do Concello, segundo consta na acta da sesión do 7 de agosto dese ano.
En aplicación da Lei de Memoria Democrática, o goberno municipal propoñerá a retirada inmediata destas distincións e a solicitude formal aos seus herdeiros e herdeiras para a devolución da Medalla de Ouro. Ademais, incluirase no pleno unha declaración institucional de rexeitamento ao réxime franquista e ás súa prácticas antidemocráticas, que durante a ditadura causaron represión e discriminación a unha grande parte da sociedade.
Como parte deste compromiso, o Concello de Padrón iniciará un proceso progresivo de retirada de símbolos franquistas que aínda permanecen en diferentes puntos do municipio.
Un Acto de Xustiza e Reparación
O alcalde de Padrón, Anxo Arca, destacou que esta acción forma parte dun esforzo máis amplo para garantir a xustiza e a reparación das vítimas da ditadura. “Cincuenta anos despois do falecemento do ditador, en pleno ano Castelao, Padrón retira toda honra a Franco. Uns recoñecementos que nunca mereceu e que pesaban sobre a memoria das súa vítimas. Sen dúda, é un acto de xustiza e reparación necesario”, afirmou.
Esta decisión reforza o compromiso do Concello cos valores democráticos e co rexeitamento a calquera forma de totalitarismo, reafirmando a defensa dos dereitos e liberdades garantidos pola Constitución de 1978.
Día da Memoria Democrática Padronesa
A medida tén lugar pouco antes da celebración do segundo Día da Memoria Democrática Padronesa, o próximo 14 de abril. Este evento supón un paso máis na reparación e recoñecemento ás vítimas do franquismo, fortalecendo o compromiso do goberno local coa defensa da democracia e dos dereitos fundamentais da cidadanía.
