Logo de dous meses de obras e melloras tras o impacto da borrasca Herminia, o Concello de Noia confirmou finalmente que a Piscina Municipal, afectada polo paso da dita galerna que azoutou a nosa comarca e a boa parte de Galicia o pasado 26 de xaneiro (con refachos de máis de 120 quilómetros por hora, causando numerosas incidencias nunha chea de concellos), abrirá as súas portas este martes 1 de abril no seu horario habitual.
No caso da Piscina Municipal de Noia, Herminia levou por diante a cuberta e as placas solares. Ao desprenderse a cuberta da estrutura que a suxeitaba os operarios municipais puxéronse mans á obra para apañar todo o material que puidera poñer en risco á veciñanza. Non houbo que lamentar danos persoais.
