O Concello de Boiro sacou a licitación o proxecto para conversión a céspede artificial do Campo da Mina, en Lampón. O alcalde, José Ramón Romero, e o concelleiro de Deportes, Marcos Fajardo, visitaron este venres 21 de marzo as instalacións con Manuel Ángel Dominguez, presidente, e Pablo Romero, membro da directiva do Sporting de Lampón para ver máis polo miúdo o proxecto.
Lembraron que o obxectivo desta actuación é “transformar o actual terreo formado de árido e con desniveis importantes nun campo de fútbol de céspede artificial dunhas dimensións exteriores de 100×56 metros”. Engadiu o concelleiro de Deportes que “con este contaríamos xa no municipio catro campos de herba artificial e un de herba natural e teríamos así cubertas as necesidades dos clubs do municipio”, afirmou o concelleiro de Deportes.
Para levar a cabo a actuación realizarase a retirada do material deportivo existente para a demolición do muro, escavacións e movementos de terra para executar un canal de formigón que recolla as augas da choiva, así como a instalación de colectores de saneamento e unha rede de drenaxe. Unha vez rematado o sistema de drenaxe, instalarase unha rede de rego e o acabado con herba artificial.
Ademais do propio terreo de xogo, instalaranse parabalóns e as varandas laterais, así como a mellora dos accesos ao terreo de xogo. “Trátase dunha renovación integral do terreo de xogo e o peche perimetral dun campo histórico como é este e que poderá aumentar a súa actividade deportiva acollendo tamén encontros e adestramentos de categorías inferiores”, recoñeceu o alcalde.
Por parte do Club agradeceron a implicación das distintas administracións que contribúen á renovación integral deste campo: “Un investimento moi necesario debido ao estado no que se atopa o campo e tamén un impulso para un club como é o Sporting de Lampón que ten xa 52 anos de historia”.
O orzamento total do proxecto ascende aos 673.325,59 euros e para levalo a cabo o Concello de Boiro conta co financiamento da Deputación da Coruña mediante o POS+ adicional. O proxecto atopase en fase de licitación, polo que as empresas interesadas poden presentar as súas ofertas mediante a Plataforma de Contratación do Sector Público ata o 9 de abril.
