Os deputados do Grupo Popular, Gonzalo Trenor e Magdalena Pérez, mantiveron unha reunión cos patróns maiores das confrarías de Porto do Son, Portosín e Lira para expresar a súa preocupación polas campañas de desprestixio que, segundo eles, están a levar a cabo con intereses partidistas contra o sector do mar en Galicia.
Os deputados populares criticaron o que consideran un uso político de cuestións como o vertido de pellets e o proxecto de Altri en Palas de Rei para “difamar sobre a calidade dos nosos produtos”. Segundo Trenor e Pérez, estas campañas buscan “sementar dúbidas” sobre a calidade dos produtos pesqueiros galegos e o estado das augas, o que prexudica a imaxe do sector.
Na reunión, na que tamén participou o alcalde de Porto do Son, Luis Oujo, os deputados analizaron a situación do sector marítimo galego e avogaron por un desenvolvemento pesqueiro sostible que combine o traballo dos pescadores co respecto polo medio ambiente. Ademais, expresaron a súa esperanza de que o novo comisario de Pesca e Océanos da Unión Europea, Costas Kadis, aposte por esta liña de traballo.
Os deputados populares comprometeron o seu traballo para “manter e defender a boa imaxe da pesca galega”, contrarrestando o que consideran “bulos” que poden danar ao sector.
