A alcaldesa do Concello de Muros, María Lago, reclamou á Xunta melloras urxentes e inmediatas no servizo de pediatría do Centro de Saúde local. Considera “inaceptábeis” os problemas e as carencias que desde hai tempo existen no servizo de pediatría. “Non falamos dun problema puntual, levamos xa un ano cunha baixa de longa duración do pediatra que traballaba só en Muros”, explica Lago, “e a outra pediatra que temos debe dar servizo tamén algunhas horas no centro de saúde de Carnota”.
“A Xunta debe cubrir de forma inminente a baixa de longa duración para recuperar a normalidade, xa que hai días nos que as familias de Carnota non teñen pediatra e veñen a Muros, colapsando a atención primaria”, engadiu, ao tempo que criticou “a inacción da Xunta de Galicia, falamos da saúde e dun servizo básico e esencial para as familias”, polo que esixiu á Consellería de Sanidade “unha solución urxente a estas carencias”.
