Os medios de comunicación públicos deberían estar ao servizo de toda a poboación, sen ningún tipo de manipulación nin control por parte dos responsables políticos nin gobernantes. Na realidade non sempre é así, un claro exemplo é a Radio e a Televisión de Galicia.
Unha parte dos profesionais da compañía da Radio e Televisión Pública de Galicia (CRTVG) levan anos sendo coartados na súa liberdade de expresión e no exercicio da independencia profesional e obxectividade informativa. Chama a atención de que sempre hai “palmeiros- pelotas”, que se posicionan a favor do poder, medorentos de sufrir recortes ou sancións laborais.
Pola súa banda, a maioría da cidadanía non nos molestamos nin en facerlles chegar ao gobernante da Xunta de Galicia o noso malestar polo control e a manipulación informativa dunha televisión pública, é dicir sufragada co diñeiro de todos os galegos, independentemente da súa ideoloxía ou status social.
Escoitar ou ver algúns dos poucos debates políticos ou informativos, é patético e moi denigrante para a saúde mental de calquera persoa normal. Sempre ocultando a realidade e defendendo a xestión do gobernante autonómico, poñendo máis énfases na política nacional, manipulada, cando o importante sería centrarse no máis próximo aos cidadáns. Galicia tería que ser a maior preocupación, baseándose na diversidade, a pluralidade e a liberdade de expresión e información.
