O Auditorio Municipal de Rianxo vai acoller este venres 28 de marzo, ás 21.00 horas, unha función da agrupación Empatía – Elisardo de la Cruz. Trátase de Esas cousas marabillosas, baseada na peza do mesmo nome do dramaturgo e director Duncan MacMillan, un fenómeno teatral a nivel mundial que chega agora a Rianxo da man da Área de Cultura do Concello e do programa Rede Cultural 2024 da Deputación da Coruña.
A obra está dirixida, adaptada e traducida por Avelino González. O protagonista é Jonny Donahoe.
A entrada será de balde até completar a capacidade do recinto, con retirada de convites na billeteira dende unha hora antes do comezo da función (máximo dúas por persoa). É unha peza recomendada para persoas maiores de 14 anos.
Esas cousas marabillosas é unha obra para público adulto, emocionante, divertida, tenra e participativa, que conta unha historia de case tres décadas que comeza cando “mamá está no hospital”, vítima dunha tentativa de suicidio. Unha historia sobre saúde mental, depresión e morte, cuestións de moita solemnidade tratadas en clave de comedia para que nos poidan, todas elas, axudar a cambiar a nosa vida…. para ben.
A obra está protagonizada por Elisardo de la Cruz, e é unha adaptación dirixida por Avelino González da peza do mesmo nome de Duncan Macmillan e Jonny Donahoe.
Esas cousas marabillosas comeza cando o público vai entrando na sala e é recibido polo actor. Dálles a benvida, axúdaos a se acomodar, e dálles un papeliño que vai xogar no espectáculo. Cando empeza o espectáculo, o público xa leva un cacho dentro del sen sabelo e algúns cun papeliño na man. Como dixemos, cóntase unha historia de case tres décadas que comeza cando… mamá está no hospital:
«Fixo unha parvada”, di papá, porque: “resúltalle difícil ser feliz”.
Esta primeira tentativa de suicidio de mamá fai que o fillo (o protagonista), de sete anos daquela, comece a facer unha lista de todo o que é marabilloso no mundo. Todo polo que vale a pena vivir.
1. Os xeados. 2. As guerras de auga. 3. O primeiro baño do verán. 4. A cor azul. 5. As roupa a cadros. 6. Unha montaña rusa.
