O Concello de Boiro recibe da Deputación da Coruña unha subvención por importe de preto de 27.000 euros para financiar gastos de dinamización do espazo coworking Lab Barbanza, pertencente á Rede de Espazos de Traballo da Deputación da Coruña.
O importe da subvención está destinado ao financiamento da asistencia técnica que realiza o asesoramento e acompañamento ás empresas instaladas no espazo, así como aquelas novas que desexen formar parte deste espazo de traballo colaborativo e innovador e que conten cun proxecto empresarial en fase de incubación ou preincubación.
Na actualidade atópanse instaladas no espazo 11 empresas de diversas tipoloxías como o ámbito forestal, a publicidade, unha nova firma innovadora (startup) con enfoque tecnolóxico, ou unha iniciativa que busca desenvolver proxectos dende unha perspectiva ambiental responsábel.
As solicitudes para formar parte do Lab Barbanza do Concello de Boiro están abertas durante todo o ano e poden facerse presentando a solicitude no Rexistro Xeral ou sede electrónica do Concello de Boiro. As bases e regulamento están dispoñíbeis para a súa consulta na web municipal.
