Un pesadelo nun espazo galego da Rede Natura, así podemos denominar ao que se nos vén enriba. É inadmisible que unha enorme factoría de celulosa que usará millóns de litros de auga ao día e que verterá auga contaminada de volta aos ríos, emitirá gases tóxicos e poñerá en perigo os sectores primarios, reciba o visto e prace dunha Administración. Coa noticia que nos levantamos hoxe confírmase que dan por bos os cambios que realizou a empresa respecto ao proxecto inicial, prometendo que se usarán os que denominan como tecnoloxías avanzadas para a xestión da auga… mentira!
Ao aprobar a Declaración de Impacto Ambiental á macrocelulosa de Altri, o señor presidente da Xunta, Alfonso Rueda, pasa a pelota ao tellado do Gobierno central. Así é o xogo dos actuais actores políticos, vémolo en cantidade de problemáticas que nos afectan día a día. Rueda continúa achandando o camiño para un proxecto “nocivo” que deberá contar igualmente coas licenzas e permisos legais. Señor Rueda 30 millóns de litros ao día de augas residuais contaminadas que verterá de volta ao río Ulla. A solución ten que ser clara e rotunda: NON PERMITILO. Queremos que Galicia siga sendo verde, que estea á vangarda do coidado ambiental e unha industria sostible.
