A Xunta adxudicou por preto de 175.000 euros o contrato para garantir a asistencia sanitaria presencial aos visitantes no Parque Nacional marítimo-terrestre das Illas Atlánticas de Galicia ao longo deste ano e tamén do seguinte.
A Consellería de Medio Ambiente e Cambio Climático quixo garantir con esta medida “a dispoñibilidade deste servizo as 24 horas do día no caso de Cíes e de Ons coincidindo cos dous períodos de tempada alta nos que existe transporte regular ás illas e nos que o límite de visitantes é maior: do 15 de maio ao 30 de setembro e durante os 10 días da Semana Santa”.
A maiores, a adxudicataria do contrato tamén se fará cargo da asistencia sanitaria que poida ser necesaria durante as excursións organizadas a calquera dos catro arquipélagos que integran o Parque Nacional (Cíes, Ons, Cortegada e Sálvora). En total, cada ano organízanse 20 viaxes deste tipo ás illas fóra de tempada alta.
Para garantir unha correcta prestación do servizo e cubrir as correspondentes quendas de traballo, o contrato require un mínimo de catro diplomados ou graduados en Enfermería. Ademais, a empresa debe contar cunha persoa que teña experiencia coordinando equipos no ámbito sanitario en espazos remotos.
Nas épocas sinaladas a asistencia prestarase durante todo o día, con 8 horas de servizo presencial no punto de primeiros auxilios ou na caseta de enfermería existentes en Cíes e en Ons. Así mesmo, en caso de que xurda unha incidencia noutro lugar destes arquipélagos, o persoal sanitario desprazarase ata alí xunto con traballadores do propio parque ou doutros servizos de emerxencias.
Co fin de poder “desenvolver correctamente o seu traballo”, o contrato exixe que en cada un dos postos de primeiros auxilios haxa dispoñíbel un mínimo de material sanitario, entre o que cómpre citar un desfibrilador externo semiautomático, boticas de primeiros auxilios, un colariño adulto e pediátrico, férulas, padiolas ou táboas de RCP (reanimación cardiopulmonar), entre outros.
A prestación do servizo establécese no propio contrato para 2025 e 2026 aínda que se prevé unha posible prórroga por un máximo de dous anos (é dicir, 2027 e 2028) en cuxo caso o valor estimado para todo o período roldaría os 350.000 euros.
