Permítame lector que hoxe entre na intimidade dunha persoa da que sempre me sentín debedor: Rosendo Rocha Villaverde, un cesureño de 80 anos que se fixo coruñés de adopción cando, con 17 anos, veu estudar electrónica na vella escola de Mestría Industrial ubicada nas inmediacións da fonte de Catro Camiños da daquela considerada capital de Galicia.
Cos seus incipientes coñecementos da electrónica aplicada á radio, Rosendo formou parte dun equipo técnico capitaneado por Enrique Fernández Calviño (ex profesor de tecnoloxía da antiga Escola Oficial de Náutica), con Edmundo Naya Naya (formidable construtor de guitarras nas súas poucas horas libres) residente en Iñás-Oleiros; Bernardo Díaz, cedeirés que tamén comezou a súa carreira técnica na Coruña para, logo, desempeñar un alto cargo en Madrid na estrutura da CAR (Cadea Azul de Radiodifusión); Paulino Santos, que compatibilizaba a súa responsabilidade como especialista de son coa de técnico de alta, e Fernando Díaz Corujo, coruñés de Catro Camiños con recendos monfortinos, técnico de alta e especialista de control e son.
Un equipo inigualable que me obriga a dicir por eles e con eles, que estou a falar da única Escola de Radio (EFJ-11) existente en Galicia e da que formaban parte, entre outros, Josè Couceiro Tovar (director), Pantaleón Bada Gómez (xefe de programas), Miguel Méndez (xefe de emisións), Pablo Campos Manrubia (locutor), Ananda Español Villar (locutora), Maruchi Guzmán Sanguino (locutora), Carlos Julio Beceiro Ledo (locutor), Carmen Deus (locutora), José María Comesaña (locutor), José Luis Arias (locutor), Rosa María Rodríguez-Rincón (locutora), María Teresa Vivero (locutora), Santiago Vilariño (locutor e técnico de son), Carlos López-Cortón Nahón (técnico de son e comentarista musical), Gerardo Fraga Blanco (técnico de son), Juan Guillín Varela (redactor deportivo e director do programa “Festa no aire”, que presentaba Manuel Hernández Sánchez (Manuel de Sanhernán), José María Guimaraens (redactor deportivo en “Saque de banda”), José Antonio Martínez Arias (redactor deportivo) e outros redactores como Antonio Amado, Jaime Guimaraens, Mario González Velo, Ángel Padín Panizo, Manuel Torre Iglesias…
Todos os citados, ligados directa ou indirectamente con quen motiva polo seu falecemento esta lembranza, o devandito Rosendo Rocha Villaverde, que nos deixou definitivamente para se converter en memoria indeleble de tantas e tangas xornadas de radio naquela Radio Xuventude de Galicia, que emitía dende o segundo andar do edificio A Terraza, nos xardíns de Méndez Núñez, onde hoxe elabora a unidade informativa de TVE as súas aportacións aos telexornais.
O benquerido Rosendo Rocha Villaverde xa é pó. Para el, que non tiña medo a subir a unha antena de máis de 30 metros de altura e para quen un equipo emisor de máis de cen quilovatios era como un simple paso nas ondas, axustar os equipos pola modulación de determinados locutores era tarefa máis grata que o emprego a esta fin de aparellos electrónicos “menos fiables”, dicía, ca voz humana.
Que gran persoa e que gran amador da radiodifusión nos deixou, amigo lector. Mágoa perdelo, porque xa non poderemos falar de Radio con ninguén que tanto soubera deste medio coma el.
Agora modulará cos arcanxos a radio do ceo do que tan preto estaba cando agatuñaba as antenas.
Descansa en paz, amigo de sempre para sempre. Un día calquera imos parolar desa outra radio que axustas no dial celestial.
