A Pobra do Caramiñal repetirá, por sexto ano consecutivo, a campaña de compostaxe dende a Concellería de Medio Ambiente e en colaboración con SOGAMA. “Dende 219, instalamos xa na Pobra 217 composteiros, maiormente na zona rural. A compostaxe é unha práctica de respecto e de coidado á natureza que consegue de forma efectiva reutilizar unha parte importante dos residuos orgánicos que se xeran nas casas, á vez que supón un aforro económico” – indicou Xosé Lois Piñeiro García, concelleiro de Medio Ambiente.
Aquel veciño ou veciña que teña interese en participar desta campaña deberá achegarse ao Concello a realizar a solicitude, onde se lle explicará o procedemento.
“Por parte do Concello colócase, de xeito gratuíto, o composteiro, un aireador e unha guía. Ademais, existirá un acompañamento técnico para garantir o bo funcionamento do sistema, coma nos anos anteriores” – engadiu Beatriz González Penalta, técnica de Medio Ambiente do Concello da da Pobra do Caramiñal.
Dende a Concellería de Medio Ambiente, destacan que ata hoxe tense evitado enviar a SOGAMA ata 9 toneladas de residuos orgánicos, xerando no proceso 2 toneladas e media de compost, cunha redución na emisións de residuos de tamén 2 toneladas e media de c02.
