Este xoves 20 de marzo celebrouse na sede da patronal de Ribeira (Asociación de Empresarios de Ribeira) o sorteo da edición 2025 da Campaña do Día do Pai, co que se quixo impulsar as compras locais nesta recta final do inverno ao tempo que se recompensa a fidelidade da veciñanza cos establecementos de proximidade do termo municipal. Segundo fixo saber o presidente da entidade, Francisco Martínez Gude, nesta convocatoria da campaña foron rexistrados finalmente 1.985 tíckets de compra. A persoa agraciada foi María de los Angeles Davila Ouviña, por unha compra local no establecemento Black Estevez. Dende a asociación aproveitaron para agradecer a fidelidade de todos os clientes que mercaron no comercio local de Ribeira.
A campaña de 2025 veu cun premio de 1.000 euros para ser investido nos comercios participantes (preto de medio cento) ao longo dunha xornada.
Desenvolveuse dende este xoves 6 de marzo até o 19 de marzo e os clientes, para participar, tiveron que subir os seus tíckets á páxina web da patronal.
O sorteo foi destinado a todas as persoas que mercasen ou consumisen nos establecementos asociados adheridos á campaña. O obxectivo fundamental foi “incrementar as vendas e incentivar o consumo no pequeno comercio retallista e hostalería de Ribeira”.
Respecto dos 1.000 euros do premio, as compras poden facerse nos máis de medio cento de comercios adheridos á campaña, cun máximo de 150 euros e un mínimo de 1 euro por local. Participan bares, restaurantes, comercios tradicionais e salóns de peiteado.
