Outes acollerá este xoves 27 de febreiro de 2025 unha nova sesión das XIX Xornadas de Información Sociosanitaria e das IV Xornadas do Programa Universitario de Maiores en Outes, dentro do IV ciclo da USC 2024-2025.
O evento celebrarase na Casa da Cultura da Serra de Outes ás 18:30 horas e contará cunha conferencia sobre “Deporte e saúde”, impartida por D. Adrián Dios Vicente, presidente da Agrupación Deportiva de Baloncesto Fontiñas e profesor da Facultade de Ciencias Económicas e Empresariais da USC. A sesión será coordinada polo doutor Xosé Mª Dios Diz, médico especialista en Atención Primaria en Outes.
Esta iniciativa, organizada polo Concello de Outes en colaboración coa USC, ADISBISMUR, a Asociación Cultural Terra de Outes e a Xerencia de Xestión Integrada de Santiago, pretende fomentar o coñecemento sobre saúde e benestar na comunidade.
As persoas interesadas en asistir deben reservar praza chamando ao teléfono 981 850 575. Ademais, a USC certificará a participación nestas xornadas cunha duración total de 16 horas.
