Trátase do cargueiro HC Eva Marie que permanece atracado no peirao transversal do porto vigués cunha carga estimada de 1.920 toneladas de munición (un promedio de 20 toneladas por cada un dos 96 contedores que transporta dende Xordania a Alemaña). O buque, de 7.878 toneladas pertence á armadora alemana HC Eva Marie Schiffanrts UG, ten bandeira de Antigua e Barbuda e foi construido no ano 2.007. Chegou ao porto vigués o pasado 26 de xaneiro para constatar o estado da carga após soportar o temporal (con ondaxe de ata 10 metros) que se rexistraba no Atlántico.
O barco transporta 96 contedores con carga de munición de clase I, División 1.1 Tipo E, a máis explosiva que existe segundo a clasificación recollida no Real Decreto 145/1989.
O pasado luns, a autoridade portuaria de Vigo sinalaba nun comunicado feito público que a munición que transporta o HC Eva Marie está desmontada, tal e como se estipula nas normas jnternacionais para o movemento desta mercadoría. Os danos causados polo furacán que azoutou a costa galega só afectaron ao exterior dos contedores, pero non á mercadoría. A carga está correctamente estibada e dentro das caixas de proteción. O cargueiro está vixiado pola Policía Portuaria e a Garda Civil, amáis dun equipo de seguridade privado de 24 horas. A Autoridade Portuaria elabora un plan de seguridade que contempla a posibilidade de mover os contedores en bo estado a unha bodega baleira do navío para illalos dos que están danados. Posteriormente, persoal especializado trasladará a carga dos que están danados a outros contedores xa preparados para ese trasvase, pero en ningún caso se fala de desembarcar no peirao a mercadoría.
Oficialmente, a Autoridade Portuaria de Vigo debe coñecer con exactitude, polo manifesto de carga do HC Eva Marie, a carga que este transporta. Pero non se especificou -confirmando ou non tal estremo- si son obuses, o que en caso de confirmación, tampouco supón -segundo se dí no ámbito portuario- “ningún risco” porque o temporal non danou a carga, aínda que sí algúns contedores.
Non pretendo poñer en dúbida, nen moito menos, os coñecementos da Autoridade Portuaria de Vigo, pero fío máis nos coñecementos do decano do Colexio Oficial de Químicos de Galicia, Manuel Rodriguez Méndez, quen fala de que a devandita carga “ten un gran poder detonante” para engadir apelando á perigosa mercadoría que transporta o cargueiro que “Por poder, pode haber unha bomba atómica”. Ninguén amosou o manifesto de carga e non deixa de ser chamativo o feito de que se transporte dende Xordania a Alemaña este tipo de carga.
O decano dos químicos galegos non fixa a súa atención exclusivamente na carga explosiva, senón en como pode estar almacenado o material explosivo que vai a bordo: “Non deberiamos alarmarnos porque iso ten que se transportar de xeito que non supoña un risco para o transporte. A súa capacidade de destruir vai depender de como estea embalado”, afirmou.
Polo de agora non se aportan datos sobre cando o cargueiro vai abandonar o porto de Vigo.
