O Concello de Ribeira presentou as actividades que se van a desenvolver para conmemorar a efeméride do Día de Rosalía de Castro, este domingo 23 de febreiro. Á presentación acudiron, o rexedor, Luís Pérez, a concelleira de Educación, Cruz Rivadulla e a técnica de Normalización Lingüística, Alicia Padín, quen explicou que malia que “o Día de Rosalía é oficialmente o día 23 de febreiro, imos festexar esta celebración durante toda a semana facendo diferentes actividades sendo unha parte moi importante dirixidas ao sector educativo”.
Pola súa banda, o alcalde, Luís Pérez Barral debullou polo miúdo os seis eventos programados para o Día de Rosalía: “Temos actividades para todos os públicos xa que para rapaces e rapazas contaremos cun obradoiro de narración oral, un recital poético e un obradoiro de pandeireta; para a mocidade haberá un concerto e para as persoas adultas regalaremos flores e libros o día 21 ou degustaremos un Caldo de Gloria o domingo 23 de febreiro”. Pérez Barral resaltou a colaboración xunto coa Fundación Rosalía nun par de actividades especiais. Unha destas actividades será unha cita institucional na mañá do día 19 ás 12.30 h da mañá, na Casa da Xuventude de Ribeira, onde está previsto facer a plantación da Figueira de Rosalía que doa a dita institución con sede en Padrón. Neste evento tamén estará o seu presidente, Anxo Angueira, para afianzar esta irmandade entre o Concello e a Fundación Rosalía de Castro. Outra colaboración será a degustación do Caldo de Gloria o domingo 23 nos diferentes establecementos de hostalería de Ribeira a quen o rexedor agradeceu a súa colaboración “por promocionar un día tan importante como é o de Rosalía de Castro”.
Pérez Barral falou da necesidade de poñer en valor a nosa lingua “sobre todo nun momento onde os datos estadísticos están demostrando que se deben aprobar medidas que fomenten o uso da lingua galega e fomenten a transmisión xeracional por parte de pais e nais a fillos e fillas” e engadiu que “Queremos potenciar o uso do galego en tódolos ámbitos e dende o Concello de Ribeira estamos traballando firmemente para que a lingua galega sexa unha lingua de uso habitual. Neste sentido informou de que dende o Servizo de Normalización Lingüística estase a impulsar unha iniciativa para que calquera persoa con independencia da súa condición e da súa nacionalidade poda vivir integramente en lingua galega”.
Programación
Día de Rosalía de Castro en Ribeira 2025
-Pre-estrea. Axudádeme a cantar de Felisa Segade e Montse Rivera
(A partir de Agora que vén a noite de Marcos Calveiro)
Data: 18/02/2025, martes
Hora: 11.00 h
Lugar: Auditorio Municipal
Dirixida a público de ensino secundario.
-Acto de plantación da Figueira de Rosalía de Castro
Fundación Rosalía de Castro e Concello de Ribeira.
Coa participación do gaiteiro Alberto Millán
Data: 19/02/2025, mércores
Hora: 12.30 h
Lugar: Exterior da Casa da Xuventude (Avda. da Constitución)
-Día de Rosalía. Os cantares de Rosalía con María Faltri
Concerto e recital na honra de Rosalía
Data: 20/02/2025, xoves
Hora: 11.00 h
Lugar: Auditorio Municipal
Dirixida a público de ensino primario.
-Día de Rosalía na Biblioteca Municipal de Ribeira
Data: 21/02/2025, venres
Horario: de 9 a 14.00 h e de 16.00 a 21.00 h
Lugar: Biblioteca Municipal de Ribeira
As persoas usuarias da biblioteca poderán achegarse á obra de Rosalía e levarán un caravel para a súa honra e recordo.
-Rosalía Cantareira de Jara Ortiz
Obradoiro de pandeireta e espectáculo de narración oral para nenos e nenas
de 3 a 12 anos e as súas familias.
Data: 22/02/2025, sábado
Hora: 12.00 h
Lugar: Centro Cultural Lustres Rivas
-Caldo de Gloria. Día de Rosalía
Data: 23/02/2025, domingo
Os establecementos hostaleiros de Ribeira convidan a súa clientela ao Caldo de Gloria na honra de Rosalía. Cocoluche; Tagen Ata; Castelao; A Recoveira; Plaza; Pedra Pateira; D’Vicio; Central
