O socialistas galegos emitiron este 18 de febreiro un comunicado no que critican a actitude da Xunta ante as necesidades dos mariscadores das nosas rías afectados polo peche dos bancos. O PSdG, a través do deputado Julio Abalde, di non comprender os porqués da negativa do Partido Popular á actividade das axudas a estes colectivos. “Os populares danlle as costas a este sector pese aos descensos de produción que no caso de especies como o berberecho chegan a un 93%”, sinalou o deputado, logo de que PP rexeitase na Comisión de Pesca e Marisqueo do Parlamento de Galicia a posta en marcha das ditas axudas. Na proposta o Grupo Socialista reclamáballe á Xunta unha convocatoria urxente de subvencións para compensar a paralización da actividade como consecuencia da baixa produtividade.
O deputado do PSdeG Julio Abalde alertou de que, unha vez que están dispoñíbeis os datos de 2024, compróbase que o descenso da produción é “dramático”, en especial, no caso de especies coma o berberecho, cunha caída do 93 %. Esta crise, dixo, “pásalles factura, sobre todo, aos profesionais do marisqueo libre, tanto a quen faenan a pé coma a quen o fan en embarcacións, pero tamén lles atinxe aos pescadores da baixura e litoral”. Engadiu que “o incremento dos prezos non compensa a drástica redución de capturas”.
Abalde advertiu de que o deterioro dos bancos “increméntase ano a ano”, co que se perden “toneladas de bivalvo e millóns de euros de facturación”. En concreto, no 2024 esta caeu á metade que no anterior quinquenio, segundo precisou. É unha realidade que a Consellería do Mar “xa non nega, pola contra recoñece, por fin, que o cambio climático, as condicións ambientais e a contaminación están afectando”, sinalou, recriminando á Xunta por “buscar culpábeis noutras administracións” e “negarse a regular o baleirado dos encoros e realizar avaliacións dos resultados das medidas que implanta”.
Por outra banda, o deputado socialista cualificou de “insuficientes” as axudas á rexeneración que a Xunta publicou en decembro, xa que “financian un máximo de 15.000 euros por proxecto”, dixo, engadindo que “outro tanto pasa coas de restauración da biodiversidade, cun total de 1,1 millóns en xullo e 1,9 en decembro para toda Galicia, cantidades que non resolven o problema actual”.
