Ano tras ano, o Entroido vai consolidando a súa importancia como unha das festividades máis importantes da Pobra do Caramiñal. Dende a Concellería de Cultura, a edil Patricia Lojo e a técnica de cultura Fita Sanisidro presentaron un calendario de actividades que busca superar as edicións pasadas.
“Ao longo desta semana de Entroido, dende a Concellería de Cultura buscamos realizar unha proposta que incluíse todos os aspectos do noso Entroido, cunha programación ateigada de música, concursos, disfraces e moita, moita diversión”, declarou a edil Patricia Lojo, engadindo que a axenda comezará cunha gran festa de entroido o sábado 1 de marzo. A Charanga Os Encerellados dará a saída das celebracións cunha ruada ás 12.00 horas, ao que se sumará ás 19.00 horas a animación de Barafunda: Festa Tribal, que servirá como antesala da festa de disfraces que arrancará ás 22.00 horas con música a cargo da Discomóbil Chocolate.
O domingo será a quenda dos máis cativos, que poderán desfrutar a partir das 17.00 h na praza Alcalde Segundo Durán dunha festa ateigada de sorpresas, e que contará cun Concurso Infantil de Disfraces e cun espectáculo de animación a cargo de Animar-T.
O martes, día 4, chegará o prato forte co imprescindíbel certame de carrozas e disfraces que arrancará ás 17.30 horas dende a Covecha, e que este ano conta cunha bolsa de premios maior que en edicións pasadas.
A proposta deste ano péchana o Enterro do Felipiño o sábado 8 ás 19.00 horas, organizado pola veciñanza da Parroquia do Xobre, e o Domingo de Piñata a cargo da veciñanza da Crocha, que dará comezo ás 18.00 horas.
