O Concello de Rianxo recibiu unha axuda de 22.000€ para dar continuidade ao Festival Viladomar, certame de arte urbana que é xa un referente no movemento cultural e artístico para transformar as nosas vilas e cidades con murais de gran tamaño e outras intervencións.
Esta subvención da Deputación da Coruña súmase á cantidade anual que o Concello de Rianxo destina a seguir dando vida a espazos deteriorados do municipio.
O Concello explicou que axiña coñeceranse as localizacións dos murais da edición deste ano.
A achega da Deputación deuse a coñecer este 6 de febreiro, xunto con outras axudas análogas da entidade provincial dirixidas a concellos da provincia para a realización en 2025 festivais de arte pública urbana na modalidade de pintura mural. Serán 149.770 euros, que se repartirán cinco eventos: o Cromático Mural Fest, de Cambre (35.000 €), o Rexenera Fest, de Carballo (35.000 €), Expresa Oleiros Urban Fest (23.350 €), Festival Viladomar, de Rianxo (21.920 €) e DesOrdes Creativas, de Ordes (34.500 €).
O vicepresidente provincial e titular de Turismo, Xosé Regueira, destacou a importancia da liña de subvencións: “Contribúen ao potencial da arte urbana, unha disciplina que permite visualizar un produto turístico atractivo e ofrece unha alternativa para dar a coñecer un destino desde outra óptica, alcanzando un tipo de visitante que ata hai poucos anos tiñamos esquecido”.
“A arte urbana”, engadiu, “converteuse nos últimos anos en soporte para a creación artística de cada vez máis municipios da provincia, e parte importante é o apoio que lle prestamos desde a Deputación”. O vicepresidente falou tamén de relevancia que teñen este festivais xa non só para o turismo, “senón tamén para as mesmas localidades, pois son quen de rexenerar espazos empobrecidos por políticas urbanísticas nefastas”.
