O Concello de Boiro saca a licitación o proxecto para a renovación de servizos e pavimentos na rúa 54 dende o encontro coa DP-1107 ata o Esteiro por importe de 148.843,26 euros. As empresas interesadas poden presentar as súas ofertas mediante a Plataforma de Contratación do Sector Público ata o 17 de marzo.
O que se pretende con esta actuación é “continuar a rede separativa de pluviais iniciada pola Deputación na DP-1107, canalizando as augas que veñen da DP coas da propia rúa para conectalas á rede separativa do Concello de Boiro existente no lugar de Esteiro”. O proxecto contempla tamén a renovación da totalidade da rede de auga para consumo existente, que na súa maioría é de PVC, e que acumula numerosas roturas nos últimos anos.
Por último, executadas as obras de servizos de recollida de pluviais e subministro de auga potable, realizarase a pavimentación completa na rúa mediante a aplicación de pavimento asfáltico en quente, agás nun pequeno espazo de 300 metros cadrados que, por mellora estética, se realizará en formigón.
Estas actuacións vanse levar a cabo mediante o POS+ 2024 da Deputación da Coruña.
