O presidente da Xunta, Alfonso Rueda, entrevístase este xoves en Bruxelas co comisario de Pesca da UE, o chipriota Costas Kadis. Será esta a primeira oportunidade na que ambos os dous manteñen un bis a bis que debe servir ao presidente galego para poñer boca arriba as cartas que Galicia pode exhibir na mesa de xogo comunitaria. De feito, na axenda de Alfonso Rueda figura a solicitude da compatibilidade en aspectos sociais e ambientais pesqueiras que Galicia é a primeira interesada en coidar.
Para o presidente galego -ao igual que para o conxunto dos galegos- resulta fundamental manter en pé o seu potencial pesqueiro; máis para elo a súa permanencia no seo da Unión Europea implica a necesidade de que esta lle permita seguir a explotar eses recursos sen ter que competir cos que terceiros países non suxeitos a normas e medidas económicas e mesmo sanitarias, introducen pola porta grande no ámbito da Comunidade Europea.
Galicia é, como sinalou Rueda antes de emprender viaxe a Bruxelas, a primeira potencia pesqueira de toda Europa. E para que manteñamos este status -que supostamente tamén interesa aos outros 26 estados membros- a Unión debe promover “un marco equitativo na captura e comercialización pesqueira a nivel internacional” que permita competir en condicións de igualdade e prantar cara a aqueles países que acadan “colocar” en Europa os seus produtos en condicións de vantaxe porque a eles non se lles esixen os mesmos requisitos.
Non existen alternativas económicamente viabeis se non son de aplicación a eses produtos non aportados polas frotas comunitarias as mesmas reglas que se demandan na UE aos que os seus barcos aportan obrigadamente, desde a trazabilidade á calidade e salubridade, como aconteceu cando foi o episodio da entrada de panga no mercado comunitario, que atopou en Galicia toda a facilidade do mundo para entrar en espazos seguros moi apetecidos, como son os colexios e centros sanitarios públicos.
Moito vai ter que expoñer Alfonso Rueda ao comisario Costas Kadis para retornar a Galicia con boas novas que trasladar a unha frota que non pasa, nen moito menos, polas mellores circunstancias.
