A cidadanía cada vez é máis consciente de que os dereitos pódense perder se non se loita por eles. Así o poñen de manifesto cada día, moitos veciños, con anterioridade xa o fixeron na parroquia de Corrubedo, logo na parroquia de Palmeira e agora nas parroquias veciñas de Carreira e Aguiño, no municipio de Ribeira, que demandan unha adecuada atención sanitaria no seu centro de atención primaria. Non piden nada extraordinario, unicamente poder dispoñer de facultativos, ante unha poboación envellecida que cada vez necesita unha maior atención médica.
Desde a Consellería de Sanidade da Xunta de Galicia e o propio SERGAS, teñen que atender as xustas demandas dos veciños por ser de xustiza. Non poden deixarse, desatendidas, ás persoas enfermas ou con patoloxías crónicas, nos centros de saúde máis próximos ás súas residencias habituais. Non todo o mundo pode acudir á sanidade privada nin desprazarse á capital do Barbanza, polos seus propios medios.
A sanidade pública, hai que protexela e manter a súa eficiencia cos medios materiais e humanos necesarios. Non se pode entender como un gasto senón un investimento na saúde das persoas, que é o ben máis prezado para calquera, independentemente do seu status social e poder adquisitivo.
