A compañía Elefante Elegante Teatro vai estar o vindeiro 22 de marzo en Rianxo para representar a súa función Kyoki, de María Torres e Gonçalo Guerreiro, un espectáculo sen palabras destinado ao público infantil e familiar que aborda a temática do esquecemento, da vellez e da soidade. Dará comezo ás 19.00 horas no Centro Sociocultural-Auditorio, Sala Arcos Moldes. A entrada será de balde até completar capacidade, coa retirada de convites na billeteira do Auditorio fixada dende unha hora antes do comezo da función (máximo 2 por persoa). Público familiar, maiores de 5 anos.
Kyoki é un espectáculo que xoga co significado do termo en xaponés, “demencia”, e que designa en termos xenéricos unha alteración da capacidade para recordar, pensar ou tomar decisións. Na peza de Elefante Elegante convídase ao público a reflexionar na teima de relacionar a demencia coas persoas idades, pero “quen nunca esqueceu onde colocou a caixa das galletas?” ou “quen non vestiu algunha vez o xersei do revés”?
Kyoki é unha ollada cómplice, reflexiva e sensíbel ás experiencias que viven tanto as persoas que precisan ser coidadas como as propias coidadoras. A familia, as institucións médicas e as institucións sociais están presentes nos tres personaxes interpretados pola actriz protagonista: a avoa, a súa filla e a doutora.
