A delegada da Xunta na Coruña, Belén do Campo, visitou este venres 14 de febreiro o Polígono Industrial Espiñeira en Boiro acompañada polo director territorial da Consellería de Economía e Industria. Isidoro Martínez, do alcalde José Ramón Romero e dos representantes dos empresarios con sede no dito parque. A visita veu motivada para coñecer as actuacións realizadas no complexo empresarial polo Concello e co obxectivo de avanzar na súa posta a punto, que recibiron un apoio da Xunta de case 106.000 euros en total.
Estes traballos permitiron instalar un sistema de seguridade grazas a unha axuda de máis de 46.000 euros e optimizar infraestruturas viarias grazas a outra axuda de case 60.000 euros, que posibilitou renovar un viario secundario do polígono de 680 metros, pavimentando as beirarrúas que quedaron sen executar en anteriores actuacións e saneando diversos tramos deteriorados.
A delegada da Xunta explicou que esta liña de axudas “contribúe a apoiar aos concellos galegos e pretende ser, ademais, un impulso para a captación de investimentos en Galicia e para a mellorar a competitividade das nosas empresas”.
Belén do Campo lembrou que esta orde da axudas repartiu, o ano pasado, na comarca do Barbanza máis de 200.000 euros entre Noia, Boiro (2 axudas) e Rianxo, a provincia da Coruña contou con 1,8 millóns de euros para apoiar a 26 parques empresariais. Os polígonos industriais de Galicia contaron cun orzamento total de 3,5 millóns de euros.
A delegada tamén informou que está aberta a nova convocatoria de axudas por importe de tres millóns de euros para mellorar as infraestruturas dos parques empresariais galegos.
A representante da Xunta subliñou que “queremos seguir dando resposta ás novas necesidades que teñen estas instalacións para modernizalas e ofrecer un mellor servizo para favorecer a fixación e implantación de compañías e promover o emprego local”. A convocatoria manterase aberta ata o vindeiro 7 de marzo.
Os apoios son de concorrencia competitiva e están dirixidos aos concellos galegos que queiran realizar melloras relativas á implantación de iluminación pública eficiente, plantas de depuración de auga, xestión de residuos, infraestruturas viarias, así como servizos centralizados de subministración de gas e hidróxeno verde.
As axudas teñen unha intensidade do 80% ata un límite máximo de 120.000 euros nos caso de solicitudes individuais e de 138.000 no caso de que sexan conxuntas. Prevense, ademais, anticipos de ata o 25% da axuda concedida.
