A falta de acceso a unha vivenda digna, adecuada e accesible impide a loita contra a pobreza en Galicia. UCIN Galicia ve moi necesario accións e medidas políticas e institucionais, tanto a nivel nacional como autonómico e local que garantan o dereito a unha vivenda e coidados adecuados para persoas maiores. Un dato de referencia son as residencias de maiores: segundo un informe publicado pola Asociación de Directoras e Xerentes de Servizos Sociais a Galicia fáltanlle 13.404 prazas nas devanditas residencias.
Sen unha vivenda, as persoas maiores enfróntanse con barreiras significativas que limitan a súa capacidade de vivir nun lugar estable e cunha calidade de vida adecuada. A isto temos que sumar, segundo datos do INE, que en España había 304.094 persoas maiores de 65 anos con algunha discapacidade. Ademais, o custo da vivenda segue sendo unha barreira importante, que lles impide acceder a vivendas asequibles.
Os problemas relacionados coa vivenda afectan hoxe dunha forma ou outra a 1 de cada 4 fogares, pero esa proporción dispárase a 9 de cada 10 se se analiza as persoas en situación de exclusión social severa. Aumentando as persoas afectadas por atrasos nos pagos relacionados coa vivenda (hipoteca, alugueiro, recibos, pobreza enerxética) obrigando a moitas familias a ter que priorizar estes gastos sobre outros como a calidade da súa alimentación: máis de catrocentos mil galegas e galegos, o 14,9% da poboación, non poden permitirse unha comida de carne, polo ou peixe polo menos cada dous días. A todo isto temos que sumar o último informe publicado polo Observatorio de Emancipación del Consejo de la Juventud de España (CJE) mostra uns resultados alarmantes. A taxa de emancipación neste ano baixou un 1,2%, situándose así no 15,3%, por baixo da media estatal. A cifra máis baixa desde que existe este índice.
José Luis Calo é coordinador de UCIN Galicia.
