A Concellaría da Igualdade da Pobra do Caramiñal organizou un amplo programa de actividades ao longo de marzo para conmemorar o Día Internacional da Muller. Segundo a concelleira Estefanía Ramos (Nós Pobra), o obxectivo é “avanzar na igualdade real entre mulleres e homes e rachar coas fendas estruturais que perpetúan as desigualdades de xénero”.
A primeira actividade, o faladoiro “As discordantes”, celebrarase o 7 de marzo no Centro Sociocomunitario e do Benestar ás 18:00 horas. O encontro, coordinado co departamento de Igualdade da Deputación da Coruña, tratará sobre saúde mental e xénero, coa participación da escritora Antía Yáñez, a xornalista Cláudia Morán e a psiquiatra e divulgadora Iria Veiga.
O propio 8 de marzo, haberá unha manifestación que partirá ás 12:30 horas da praza do Alcalde Segundo Durán e finalizará na casa do concello, onde se lerá un manifesto. Ademais, inaugurarase a exposición “Museo da Equidade” nos xardíns de Valle-Inclán, con esculturas do alumnado do CEP Salustiano Rey Eiras inspiradas na obra “Como agua” de Isabel Soler, en homenaxe ás vítimas da violencia machista.
Tamén o 8M, a partir das 10:00 horas, ofrecerase un seminario de defensa persoal feminina no pavillón municipal da rúa de Venecia. Con duración de tres horas, está dirixido a mulleres de 12 a 70 anos. As inscricións pódense realizar na web da Deputación da Coruña ou chamando ao 981 832 764 (ext.6).
O 11 de marzo, ás 16:00 horas, o profesorado e as familias están convocados a un obradoiro de masculinidades positivas no IES da Pobra, impartido por Xosé Cabido. Haberá un servizo de conciliación paralelo para quen o precise.
As Xornadas Muller e Ciencia celebraranse o 15 de marzo no auditorio da biblioteca municipal, de 18:00 a 20:00 horas. As conferencias abordarán a rexeneración do cerebro e a produción de biodiésel con algas mariñas, a cargo de Jannete Rodríguez-Pallares, doutora en Medicina e Ciruxía pola USC, e Xana Álvarez Bermúdez, enxeñeira agroforestal da Universidade de Vigo. Tamén se habilitará un obradoiro de conciliación.
Finalmente, o 26 de marzo instalarase o stand da campaña “Agresión OFF: Eu digo non á violencia sexual” no IES da Pobra. Esta iniciativa, impulsada pola Consellería de Política Social e Igualdade en colaboración coa Fegamp, busca sensibilizar o alumnado sobre a necesidade de erradicar condutas violentas e non igualitarias mediante talleres e actividades lúdicas.
