A conciliación da vida familiar e laboral é cada vez máis interesante para a maioría de traballadores, de aí a importancia que ten a redución da xornada laboral e que ademais é unha tendencia xeneralizada na Unión Europea.
O artigo 34 do Estatuto dos Traballadores, sinala que a xornada laboral será de 40 horas semanais de traballo efectivo. Agora, en España, preténdese reducir a xornada semanal, como xa ocorre noutros moitos países europeos como Alemaña, Países Baixos, Dinamarca ou Bélxica. O exemplo deses países demostrou que cunha boa organización empresarial, traballando menos horas xérase unha maior produción.
Ser produtivo é saber organizar as túas responsabilidades e ter a disciplina necesaria para seguir o establecido, para iso en España é necesario un cambio radical de mentalidades. Esa, é a materia pendente nas relacións laborais xa que a redución da xornada laboral non vai supoñer ningún tipo de prexuízo para as empresas senón todo o contrario. Ademais, na maioría dos convenios colectivos, xa se establecen xornadas de traballo inferiores á establecida no propio Estatuto dos Traballadores.
Recordo, hai algúns anos, cando a Consellería de Pesca da Xunta de Galicia quixo decretar o descanso semanal para as fins de semana, moitos armadores puxeron o berro no ceo e prognosticaban o principio do fin da actividade pesqueira de baixura. Non foi así, evidentemente, xa que as causas da crise pesqueira non era a redución da xornada ou o descanso semanal senón a maneira na que se explotaban os recursos pesqueiros e marisqueiros. Aquí as empresas pensaban unicamente nos seus propios beneficios sen sopesar que os traballadores necesitaban tamén estar coas súas parellas e fillos, polo menos dous días á semana, que non era moito pedir.
