A agrupación UCIN (Unión de Cidadáns Independentes) compartiu un comunicado no que demanda “mellorar o servizo de transporte público no Barbanza”. No documento sinalan que “ata o de agora non se fixo nada ante as demandas e necesidades dos usuarios”.
Desde a formación UCIN salientan a necesidade de reforzar as fins de semana, pola intensa demanda existente, dado o elevado número de estudantes que se desprazan a Santiago de Compostela, A Coruña, Vigo e Pontevedra. “Non podemos esquecernos que Barbanza é a esquecida en conexión ferroviaria”, sinalan, engadindo que “a comunicación entre as cidades galegas, é unha das queixas máis recorrentes dos residentes en Galicia” e que “o número de prazas esgótase axiña, hai conexións directas inexistentes, localidades totalmente abandonadas e, enriba, os horarios de autobús son moi reducidos, sobre todo a fin de semana.
José Luis Calo sinala que “temos que loitar por ofrecer un transporte público adaptado á realidade de Galicia para que os veciños conten cun sistema eficiente e accesíbel, agardemos que a Xunta implemente melloras que respondan as demandas dos usuarios e que fagan do transporte público unha opción máis útil e fiábel”.
