O Concello de Ribeira informou do remate dos traballos de instalación de paneis fotovoltaicos en diversos equipamentos públicos do municipio, unha actuación que representa un novo avance nas políticas do Goberno local a prol da sustentabilidade e o aforro enerxético. En concreto, foron obxecto destes equipamentos o Auditorio Municipal, o Complexo Deportivo da Fieteira e a sede da UCA.
Estas intervencións supuxeron un investimento de 263.226€ euros, financiados grazas a unha combinación de fondos municipais e axudas provenientes de programas europeos. “Os paneis instalados”, explicaron fontes do Concello, “permitirán reducir de forma significativa o consumo eléctrico das instalacións públicas, contribuíndo así á redución das emisións de CO2 e fomentando o uso de enerxía limpa”.
O alcalde Luís Pérez Barral sinalou que “grazas a este investimento avanzamos na transición enerxética facendo que a enerxía que consumen as instalacións públicas non teña un impacto negativo no medio ambiente. Con esta actuación reducimos o impacto ambiental e ademais optimizamos os recursos públicos grazas ao aforro que se derivará destes sistemas fotovoltaicos”. Para o rexedor, estes traballos son “un exemplo de como a administracións públicas podemos liderar cambios positivos que beneficien á cidadanía e ao medio ambiente”. O alcalde tamén quixo destacar a importancia de continuar promovendo iniciativas sustentábeis no futuro: “Seguiremos apostando por proxectos innovadores como estes en espazos como o Mercado Municipal ou a Casa Consistorial, entre outros puntos, e para iso estamos traballando en conseguir fondos doutras administracións que permitan avanzar no desenvolvemento sostíbel e acadar aforros económicos”.
A posta en marcha destas instalacións fotovoltaicas forma parte dunha estratexia máis ampla que busca facer de Ribeira un concello respectuoso co medio ambiente e reducir a dependencia de fontes tradicionais de enerxía, xerando un aforro económico.
Así pois o Auditorio ten unha potencia instalada de 277.128 W mentres que os paneis poderán achegar unha potencia de 79.200 W (28.58% do consumo total). No Complexo Deportivo da Fieiteira a potencia instalada é de 277.120 W e os paneis poderán achegar unha potencia de 99.900 W (36.06% do consumo total). Por último na UCA a potencia da instalación é de 69.280 W, mentres que os paneis poderán producir 10.800 W (15,59% do consumo total).
