Entre a medianoite e as 11 horas desta mañá, o Centro Integrado de Atención ás Emerxencias xestionou un total de 213 incidencias provocadas polos efectos da chuvia e do vento. Nestes momentos permanece activa unha alerta laranxa por chuvia no suroeste e de vento no oeste da Coruña, así como a de temporal costeiro nas provincias da Coruña e Pontevedra.
Precisamente son estas dúas zonas as máis afectadas pola meteoroloxía adversa: A Coruña sumou 130 incidencias, polas 65 de Pontevedra, as 14 de Lugo e as 4 de Ourense.
Santiago de Compostela e Vigo foron, cunha ampla diferenza, os concellos máis castigados pola chuvia, con 37 e 21 casos rexistrados respectivamente. Na provincia da Coruña destacan tamén Ames e A Coruña, con 7 cada un, e Boiro, Brión e Ribeira, con 5. Na de Pontevedra, A Estrada e Vilagarcía (4) e Gondomar, Pontevedra e Redondela (3) aparecen á continuación da cidade olívica.
Como adoita ocorrer, as incidencias máis repetidas tiveron que ver coa presenza de árbores e pólas nas vías de circulación (66), así coma outros obstáculos na calzada (27). A chuvia provocou o anegamento de vivendas e garaxes (28), estradas (22), rúas (9) e bolsas de auga (10). Por outra banda, destacaron as intervencións dos servizos de emerxencias para previr riscos maiores (como retirar vexetación ou asegurar fachadas), con 22 casos.
Incidencias destacadas
Aínda que o 112 Galicia non rexistrou incidencias de consideración, si que destacamos o rescate dunha muller que quedou atrapada no seu coche pola auga na ponte de Laraniño, en Laraño (Santiago), pouco antes das 9:30 horas da mañá. Os bombeiros municipais tiveron que intervir para sacar do vehículo á implicada, que se atopaba en bo estado. Tamén participou a Garda Civil de Tráfico.
