Este luns 13 de xaneiro celebrouse no Centro Náutico do Freixo (Outes) a xornada Camiñando Xuntos, dirixida a persoas profesionais do turismo, da cultura do benestar e sectores afíns, interesadas no intercambio de ideas e explorar oportunidades de colaboración en proxectos futuros. Na inauguración das actividades, nas que participaron unha vintena de asistentes, participou o alcalde, Manolo González.
A xornada estivo organizada polo Polo de Emprendemento e Apoio ao Emprego de Coristanco, pertencente á Xunta de Galicia. A actividade celebrouse durante toda a mañá no Centro Náutico do Freixo.
Esta iniciativa xurdiu da necesidade de apoiar proxectos emerxentes acompañados polo Polo de Emprendemento e Apoio ao Emprego de Coristanco, que buscan explorar novas liñas de traballo e fomentar innovacións que respondan ás demandas dun turismo máis sostíbel e enriquecedor.
O evento estruturouse en sesións dinámicas, incluíndo presentacións breves dos participantes, encontros de speed dating profesional e un obradoiro de cocreación onde se traballaron propostas conxuntas. “Estas actividades están pensadas para facilitar conexións significativas, potenciar sinerxías e desenvolver proxectos que integren cultura local, prácticas de benestar e contacto coa natureza”, informou a organización.
Polo Coristanco
Trátase dunha iniciativa para o emprego e o emprendemento innovador cuxa área de actuación abrangue xeograficamente as comarcas de Bergantiños, Fisterra, Terra de Soneira, Barcala, Xallas, Muros e Noia (Barbanza-Muros-Noia). O Polo de emprendemento e apoio ao emprego Coristanco atópase no Centro de Promoción Rural – EFA Fonteboa, en Coristanco. A súa área de influencia cubre os seguintes concellos: A Laracha, Carballo, Ponteceso, Laxe, Malpica de Bergantiños, Cabana de Bergantiños, Coristanco; Corcubión, Dumbría, Fisterra, Muxía, Cee; Camariñas, Vimianzo, Zas; A Baña, Negreira; Mazaricos, Santa Comba; Muros, Carnota; Lousame, Noia, Outes e Porto do Son.
