Na sesión plenaria extraordinaria do Concello de Padrón, celebrada este luns 13 de xaneiro de 2025, aprobouse por unanimidade a proposta do Executivo local que destinaba 61.903,04€ do POS+ Adicional a apoiar ás persoas máis vulnerábeis. Unha parte da cantidade aportada pola Deputación da Coruña (46.903,04€) destinarase ao fondo de axudas de emerxencia social. Segundo explicou o Goberno local, “o dito fondo ten como obxectivo cubrir necesidades básicas esenciais das persoas en situación de vulnerabilidade tales como vivenda, alimentación, gastos médicos ou farmacéuticos, educación e transporte”. O Concello valorou que “a aprobación desta iniciativa resalta o compromiso deste Goberno e da Deputación coa atención ás persoas en risco de exclusión” e engadiu que “as axudas de emerxencia permitirán proporcionar unha resposta rápida e efectiva ante situacións de dificultade económica ou adversidade, contribuíndo á estabilidade dos fogares afectados por ter menores ingresos ou situacións puntuais”.
En palabras do alcalde Anxo Arca, “estamos a reforzar estas axudas para que actúen como unha rede de seguridade que preveña que as persoas caian en niveis máis graves de pobreza económica e exclusión social, proporcionando un apoio inmediato. Ao mesmo tempo, evitamos as consecuencias negativas a longo prazo, como a perda de emprego ou a desestruturación familiar e favorecemos a reintegración social e económica ao proporcionar os recursos necesarios para a recuperación. Desta forma, non só se contribúe ao benestar individual, senón que tamén fortalece a cohesión social e promove unha sociedade máis solidaria e inclusiva”.
Ademais, destínanse 15.000 € ao Programa Babel, que se centra na integración de persoas migrantes e mulleres en situación de vulnerabilidade. Este programa ten como obxectivo a alfabetización, a aprendizaxe do idioma e a adaptación á contorna, brindando as ferramentas necesarias para mellorar a inclusión social e empregabilidade destes colectivos.
.
